Igisirikare cya Amerika kijyiye gufasha Ingabo za Repubulika Iharanira Demokarasi ya Congo FARDC.

Umwaka ushize, Ku wa 4 Ukuboza, I Washington muri Leta Zunze Ubumwe za Amerika, Repubulika Iharanira Demokarasi ya Congo na Amerika byashyize umukono ku masezerano y’ubufatanye ku bijyanye n’ingabo n’umutekano.

Igihe yasinywaga, ibisobanuro birambuye ku bikubiye muri ayo masezerano ntibyahise bishyirwa ahagaragara. Icyakora, inyandiko y’ayo masezerano ubu yamaze kumenyekana.

Kimwe mu bintu by’ingenzi bigaragara muri ayo masezerano harimo no kurinda ahacukurwa amabuye y’agaciro muri Repubulika Iharanira Demokarasi ya Congo.

Mu rwego rwo gufasha Repubulika Iharanira Demokarasi ya Congo kongera ubushobozi bw’Ingabo zayo, iyi nyandiko ivuga ko hagiye kongerwa amahugurwa ya gisirikare ku ngabo za Repubulika Iharanira Demokarasi ya Congo.

uretse amahugurwa azahabwa ingabo za Repubulika Iharanira Demokarasi ya Congo kandi harimo ubufasha m’ubutasi bwa gisirikare, ibijyanye n’ibikoresho(logistics), ndetse no kubaka ubuhanga bwa gisirikare mu ngabo za Repubulika Iharanira Demokarasi ya Congo.

Ubu bufatanye kandi buzibanda ku kugenzura imipaka no guhanahana amakuru ajyanye n’umutekano.

Ku bijyanye no guha RDC ibikoresho bya gisirikare no kuvugurura ubushobozi bw’Ingabo za FARDC,izi nyandiko zigaragaza ko ibyo bizakorwa mu byiciro bitandukanye.

Amerika ivuga ko ishobora gusuzuma niba izakomeza gutanga ubwo bufasha mu gihe Ingabo za Repubulika Iharanira Demokarasi ya Congo zaba zigaragaje iterambere rirambye mu kubaka igisirikare cy’umwuga, kubahiriza uburenganzira bwa muntu no kugira uburyo bwo kubazwa inshingano.

Aya masezerano ateganyijwe kumara imyaka itanu, ariko afite umwihariko kuko hari izindi nyandiko zigomba gutegurwa kugira ngo zisobanure mu buryo burambuye uko ingingo z’ubu bufatanye zizashyirwa mu bikorwa akantu ku kandi.