Arteta agiye kugira ikibazo cyo guhitamo ba myugariro, Saliba yagarutse mu gihe Konsa ari mu bihe byiza

Saliba yari amaze hafi amezi ane adakina kubera imvune yo mu mugongo yagiriye mu mukino wa ½ cy’Igikombe cy’Isi cya 2026, aho yari ahagarariye Ikipe y’Igihugu y’u Bufaransa. Uyu myugariro w’imyaka 25 yamaze gusubira mu myitozo isanzwe ya Arsenal, ndetse anagaragara mu bakinnyi bajyanye n’ikipe mu mukino wa UEFA Champions League izahuramo na Slavia Prague.

Mu gihe Saliba yari adahari, Arsenal yazanye Ezri Konsa imukuye muri Aston Villa ku kayabo ka miliyoni 55 z’amapawundi. Uyu myugariro w’Umwongereza yahise yigarurira umwanya mu mutima w’ubwugarizi, aho yakoranye neza na Gabriel Magalhães.

Konsa amaze kwerekana ko ari umwe mu bakinnyi bagize uruhare rukomeye mu musaruro mwiza wa Arsenal muri uyu mwaka w’imikino. Yafashije iyi kipe gukomeza kugira ubwugarizi bukomeye, ndetse anitwara neza mu mikino ikomeye irimo uwo Arsenal yatsinzemo Liverpool kuri Anfield.

Ibi ni byo bishobora gushyira Arteta mu ihurizo, kuko gusubiza Saliba mu kibuga bishobora gutuma Konsa atakaza umwanya yari amaze kubona. Gusa, kumusubiza ku ntebe y’abasimbura na byo bishobora guhungabanya umusaruro mwiza amaze gutanga.

Hari igitekerezo cy’uko Konsa ashobora kwimurirwa ku ruhande rw’iburyo rw’ubwugarizi, Saliba agasubirana umwanya we wo gukina hagati hamwe na Gabriel. Icyakora, ibyo byasaba Arteta kongera gutekereza ku myanya ya Ben White na Jurriën Timber na bo bashobora gukina kuri urwo ruhande.

Mu kiganiro n’itangazamakuru, Arteta yavuze ko Saliba ameze neza kandi ko yiteguye kongera kubona iminota yo gukina. Yavuze ko yakinnye iminota 45 mu mukino wa gicuti wabereye mu muhezo, kandi ko uko yakurikiranywe mu gihe cyo gukira byagenze neza.

Arteta yanavuze ko kuba afite abakinnyi nka Saliba na Konsa atari ikibazo, ahubwo ari amahirwe azafasha Arsenal gucunga neza imbaraga z’abakinnyi no kubaha umwanya wo gukina.

Kugaruka kwa Saliba rero ni inkuru nziza kuri Arsenal, ariko bishobora no gutuma Arteta agira akazi gakomeye ko guhitamo abakinnyi bazajya babanza mu bwugarizi, cyane ko Konsa amaze kwerekana ko akwiriye kugumana umwanya yahawe.